लेखिका : देवी नागरानी
अनुवाद : पदमा गोविंद मोटवानी
यादि ईंदा आहिनि हर सालि “गणपति बप्पा मोरिया” जी स्थापना ऐं विसर्जन जा घणेई मौका, जड॒हिं गाडि॒युनि में वेही करे माण्हुनि जो हुजूमु मुंबईअ जे जुहू बीच ते हली वेंदो हुओ, ऐं गणपतिअ जे विसर्जन खां पोइ खिल ख़ुशीअ सां मोदक जो प्रसाद खाईंदे सभेई घरु मोटी ईंदा हुआ। मौसम जा उहे नज़ारा यादिगिरियुनि में घणेई दफ़ा, हर घड़ी ख़ुद खे दोहराईंदा रहंदा आहिनि।
हिन सालि मूंखे मुंहिंजे झूननि दोस्तनि ऐं शुभचिंतकनि हिन पवितरु डीं॒हं जूं शुभकामनाऊं मोकलियूं। भलो थिए व्हाट्सएप जो, जेको अडे॒ ते ई संदेशु खणी थो अचे ऐं खणी पिणि वञे थो। न त झूना डीं॒हं डा॒ढा यादि ईंदा आहिनि, जड॒हिं पीउ जो ख़तु हैदराबाद खां मुंबई पंद्रहनि डीं॒हंनि खां पोइ पहुचंदो हुओं ऐं सजे॒ महिने खां पोइ वापसी जवाबु मिलंदो हुओ।
मुंहिंजे हिक शागिर्द कार्तिक जो संदेशु आयो- ‘आंटी श्री गणेशु तव्हांखे वडी॒ उमिरि बख़्शे ऐं सेहतमंदु रखे। तव्हांजी डा॒ढी यादि ईंदी आहे। उनहंनि डीं॒हंनि जी, जड॒हिं मां तव्हां वटि पढ़ण ऐं गणित सिखण ईंदो हुअसि। हाणे मां पंहिंजे बि॒न्ही बा॒रनि खे उहे गा॒ल्हियूं बु॒धाईंदो रहंदो आहियां। जेकर तव्हां मुंबईअ में हुजो हा त उहे बि तव्हां वटि ई गणित सिखण अचनि हा।’
‘अरे कार्तिक गणित जी गा॒ल्हि न करि। उहो 1980 जो वक्तु हुओ। हींअर पाण 1921 जे कष्टकाल में जी रहिया आहियूं। मां बि त 40 साल वडी॒ थी वेई आहियां। ऐं हिन वधंदरि उमिरि जे नवनि निज़ारनि खे डि॒सी रही आहियां, उन्हंनि खां कुझु सिखी रही आहियां। किथे गणित ऐं किथे ही हालतूं, कोई तालमेल ई कोन्हे।’ मूं जवाब में लिखियोमांसि।
‘अरे ईंदसि, जल्दी ईंदसि। पर कड॒हिं, चई नथी सघां। यादि अथई जड॒हिं
बप्पा जा दर्शन करण मां तुहिंजे घरु आई हुअसि त तुहिंजी माउ मूंखे चयो हुओ ‘परींअ विसर्जन थींदो, टीचर तव्हां ज़रूर अचिजो’ लिखंदे मुंहिजो मनु अलाए छो मुर्कण थो लगे॒।
‘हा, अचण जी कोशिश ज़रूर कंदसि’ मुंहिंजो जवाब हुओ।
ऐं तो मासूमियत सां मुंहिंजो हथु पकिड़ींदे चयो हुओ -‘टीचर तव्हांजो विसर्जन कड॒हिं थींदो?’
‘मुंहिंजो विसर्जन छो थींदो कार्तिक, मां कोई गणपति आहियां?’
उन मासूमियत खे हिते हुते गो॒लींदी आहियां त गुज़िरियल डीं॒हं अखियुनि आडो॒ सिनेमा जे निज़ारनि वांगुरु घुमण लगं॒दा आहिनि। हाणे डि॒सु न, तूं ख़ुद बि॒नि बा॒रनि जो पीउ थी वियो आहीं ऐं मूंखे पंहिंजो समुझी लिखयई, वाकई में डा॒ढो सुठो लगो॒। मां हींअर बि नथी चई सघां त मुंहिंजो विसर्जन कड॒हिं थींदो? जेको गुज़िरियल 40 वरिह्यनि में कोन थियो, उहो सुभाणे, कींअ ऐं कड॒हिं थींदो, इहो त गणपति बाबा खे ई ख़बर आहे। मां त बसि पंहिंजे झूननि डीं॒हंनि जी यादिगिरियुनि खे झूले में झुलाए पाण खे विंदुराए वठंदी आहियां। उमिरि दराज़ु रहंदे।’
शुभकामनाउनि साणु
तुंहिंजी टीचर आंटी
देवी नागरानी
padmamotwani1411@gmail.com