लेखिका : देवी नागरानी
अनुवाद : पदमा गोविंद मोटवानी
अजु॒क‌ल जे फ़ैशन मूजिबि किट्टी पार्टी आमु थियण लगी॒ आहे। अहिड़ी ई ड॒हनि औरतुनि जी हिक पार्टी अजु॒ सविता जे बंगुले ते थी रही आहे। ख़ूबु खाधो-पीतो, गा॒इणु-वजा॒इणु, अन्ताक्षरी ऐं पछाड़ीअ में किट्टीअ जी चिटिकी कढणु। हिन भेरे कुसुम जी लाट्री लगी॒। हर हिक औरत ड॒ह ड॒ह हज़ार हुन खे डीं॒दे लखु रुपया मिलण जी वाधाई डि॒नी। कुसुम घणे जदोजहदु सां पैसा समेटिया ऐं हिक प्लास्टिक जी थेल्हीअ में विझी पासीरा करे रखी छडि॒या।
निकरंदे वक़्तु मेज़बान सविता बचियल तामनु जो हिकु दबो॒ ठाहे कुसुमु खे ऐं हिकु हिकु दबो॒ बि॒यनि सभिनी साहिड़ियुनि खे बि डि॒नो। औरतुनि जो उहो झुण्ड पंहिंजे पंहिंजे घरु वञण जे लाइ सविता जे घरां निकितो ऐं पोइ सभु पंहिंजे पंहिंजे पासे हलंदियूं थियूं। पुठियां रहिजी वेयूं ‘बाई-बाई, सी यू’ जूं आवाज़ूं.!
कुसुमु जी गाडी॒ हिक सिग्नल ते जीअं ई रुकिजी, हिकु निहायतु ई कमज़ोरु ग़रीबु मंगितो हथु फैलाए खाधे जे लाइ पैसा घुरी रहियो हुओ। ख़बर नाहे, कुसुमु छा सोचींदे पासे में रखियल बि॒नि थेलियुनि मां हिक खे खाधे जी थेल्ही समुझी उहा हुन मंगिते खे डि॒नी ऐं घर डां॒हुं रवानी थी वेई। जड॒हिं घरु पहुती त पहिरीं हुन थेल्ही खोली, जीअं ई हथु विझी करे पैसा कढण जी कोशिश कयाईं त हैरानु थी वेई। उन में बचियल खाधो पियो हुओ, हिकु लखि रुपयनि वारी थेल्ही त हूअ हुन मंगिते खे डे॒ई आई हुई।
उन खाधे ते त न, पर सजी॒ उमिरि पेटु भरे खाइण जे लाइ एतिरी वडी॒ रकम मिलण ते मंगितो त मालामालु थी वियो ऐं खाधो खाईंदे ख़बर कोन्हे कुसुमु खे केतिरियूं दुआऊं डीं॒दो रहियो हूंदो। नसीबु पंहिंजो पंहिंजो आहे। अणजा॒णाईअ में डि॒नल बिख्या पंहिंजो मुल्हु पाण ई कथियो।
padmamotwani1411@gmail.com