लेखिका : देवी नागरानी
अनुवाद : पदमा गोविंद मोटवानी
पुट-नूंहं जीअं बि॒यनि जूं सूखिड़ियूं खोलियूं, तीअं ई मुंहिंजी बि…! सभिनी जे मन में बेताबी हुई…पर अजबु!! उन मां हिक सुहिणो किताबु
निकितो, हिक सौ बा॒ल कविताउनि सां गडो॒गडि॒ लुभाईंदड़ि चित्र बि हुआ…उन्वान पढ़ियो वियो ” My first step to Literacy”.
जीअं जीअं यशु वडो॒ थींदो रहियो, ज़िंदगीअ जे उथिलंदरि सुफ़्हनि सां गडो॒गडि॒ मां हर राति जो हुन खे उन किताब मां हिकु बैतु पढ़ी करे बु॒धाईंदी हुअसि ऐं बदिलजंदड़ि हालतुनि सां हुन जे अखियुनि में बदिलियल तस्वीरुनि खे डि॒सी हुन खे समुझंदी हुअसि। तारनि जूं तस्वीरूं डि॒संदो हुओ त चवंदो हुओ “Twinkle twinkle little star”,
कुर्सी अ हेठां वेठलु बि॒लीअ खे डि॒संदो हुओ त चवंदो हुओ “Pussy cat, pussy cat”।
हीअंर हूं सतनि वरिह्यनि जो आहे ऐं हुन जी नंढी भेण टिनि वरिह्यनि जी। सुभावीकु आहे ४० वरिह्यनि खां पढ़ंदे पढ़ाईंदे बा॒रनि सां एतिरो हिरी वेई आहियां जो मुंहिंजे अंदर में बा॒ल विद्या जो हिकु सुहिणो संसारु सजायलि आहे। नूंहं खे चयुमि “हूअ बा॒ल कविताउनि जो किताबु त गो॒ल्हि, हाणे वक़्तु आयो आहे, हिन नंढी परीअ खे कुझु पढ़ी बु॒धाया।”
गा॒ल्हि आई वई थी वेई….ऐं हिक डीं॒हुं हुन जी भाभी असां वटि आई त मूं हुन खे किताब जी यादि डि॒यारींदे चयो “हाणे त तुंहिंजी धीअ बि छहनि वरिह्यनि जी थी आहे। मूंखे उहो किताबु मुन्नीअ लाइ घुरिजे।
” पर आंटी उहो त मूं मुंहिंजी भेण खे डे॒ई छडि॒यो। एतिरे सुठे किताब मां मुंंहिंजी धीअ सवले नमूने बैत सिखी वरिता त सोचियमु हुन खे डे॒ई छडि॒यां।”
तड॒हिं जा॒तमु त विद्या जी विरासत बि गंगा वांगुरि वहंदी रहंदी आहे, पर हिक बि॒ए पासे में! जड॒हिं पंहिंजे घर में बि॒यो संतानु आयो त ज्ञान जी उहा गंगा बि॒ए हंधु वहंदी रही…! इहो सोचींदे हिक दफ़े नूंहं जी भाभीअ जी भेण खां पुछियोमांसु। ” किरन, उहो बैतनु जो किताबु तो वटि अञां ताईं बि सलामतु आहे?”
कुझु हैरानीअ सां मूंखे डि॒संदे चवण लगी॒ “आंटी, उहो त मूं पंहिंजी भाभीअ खे हुन जे पुट लाइ डे॒ई छडि॒यो आहे।”
padmamotwani1411@gmail.com