बार पहाका बुधी ऐं वाचे करे पहिंजी जाण वधाये था सघनि लेकिन खुश थीन्दा रांदि करण सां। सिन्धु जूं झूनियूं गाल्हियूं बुधण या वाचण जे मुकाबिले उननि खे पहिंजियूं सिन्धी लोक रांदियूं करण में वधीक लस्त इन्दी। आनंद इन्दुनि सिन्धी मालपुआ, घेवर, खीचा-पापड़, सीरो ऐं ऐहिड़ोई माल-टाल खाइण सां। सचु त इयो बि आहे कि अणजाण बार भी इननि शइनि खां बि वधीक मिठी बोलीअ जे जादूअ सां तव्हां जा पहिंजा बणजी वेन्दा आहिनि। असीं पहिंजे बारनि लाइ कुझु बि करण लाइ हमेश तियार रहिन्दा आहियूं छो जो बारनि सां ई हीअ जगत खुश आहे। यादि कयो अकबर-बीरबल जी उव्हा आखाणी, जंहिंमें बादशाह अकबर बि पहिंजे पोटे जी खुशीअ लाइ हौद में घिरी वयो हो। भगवान बि पहिंजे भगति नन्ढुड़े बार प्रहलाद जी खुशीअ लाइ थम्बु फाड़े नरसिंह रूप में प्रकट थियो। बालक भगति धुु्रव भगवान खे ऐतिड़े कदरु प्यारो थियो कि अजु तांणी सुझु-चंङु सां गडु उव्हो बि उभ में सभिनी तारनि जे विचु चिमके थो। बारनि जी हिक खिल सजे सुर्ग जो सुख थीन्दी आहे। असांजी सिन्धु संस्कृतिअ में सामाजिक जीवन खे खुशगवार बणाये रखण लाइ घणाई रीति-रिवाज ऐं परम्पराऊं हजारें वरियहनि खां कायम रहिया आहिनि। इननि में बारनि जूं लोक रांदियूं बि शामिल आहिनि। बाकी सभु त ठीक आहे लेकिन वडनि शहरनि में इ न बल्कि नन्ढुड़नि गोठनि में भी अजु घणीयूंई लोक रांदियूं खत्म थी रहियूं आहिनि। छो जो असीं हिक पाड़े में, हिक गोठ में रहिण जे बदरां जुदा जुदा पाड़नि, गोठनि में रहण लाइ लाचार आहियूं। इन्हीअ वजहं सां केतिरियूं ई रान्दियूं अजु असीं वेसारे चुक्या आहियूं जहिड़ोकि 1. घिब घोड़ी 2. खोखड़ो 3. हेडांहंु बि चमाट होडांहुं बि चमाट 4. वंझ वटी 5. चनर चीलो 6. टिण 7.नव टिण 8. लिकलिकोटी 9. गुलफेरी वगैरह। असांजे सिन्धी समाज जी विरासत ऐहिड़िनि लोक रांदियूंनि खे महफूज रखण असांजो ई फर्जु आहे। इयो कमु तडहिं सक्षारथो थी सघन्दो, जडंहिं असीं सिन्धी बोली, भाषा-साहित्य ऐं संस्कृतिअ जे बारे में पहिंजे बारनि खे समूरी जाण डीन्दा से। त सांई चवो जय शिव भोले ऐं अजु खां ई बारनि खे सिन्धियत बाबत बुधाइण शुरू कयो । जय जय शिव शंकर, कांटा लगे न कंकर….। जय झूलेलाल। – मोहन थानवी
अचो बारओं रांदि कयूं
दरअसलि स्कूलनि में ऊनारे जूं मोकलियूं थी वयूं आहिनि। इनि करे पाड़े जा घणाई बार पहिंजी नानीअ जे घरु हली वया आहिनि। कुझु बार हिल स्टेशन ते ऊनारे में बि सियारे जा मजा था वठनि। पहाड़नि ते इननि डिहनि में बि थदकार थीन्दी आहे। लेकिन कुझु बार इनि हुबस सां भरियलि ऊनारे जी मुंद में बि पहिंजे घर खां परे कोन था वंञी सघनि। उननि खे टाइम पास करण लाइ या त मोकलनि में बि पढ़हणो तो पवे या वरी टीवी चैनलनि ते प्रोग्राम डिसी डीहुं-रात खुराफातियूं था सोचनि। ऐहिड़े माहौल में बारनि लाई सभ खां वधीक कारगर तरीको आहे रांदि करण। बार हिक बे खे सडु करे चवन्दे बि बुधा हून्दा, अच रे बालू रांदि कयूं। रांदिनि जी पहिंजी अहमियत आहे। रांदि करे बार ई न बल्कि वडा माण्हू बि दिमागी कसरत करे वठन्दा आहिनि। शरीर खे बि चुस्त-दुरुस्त बणाये रखण में रांदिनि जो घणो महताव आहे। बारनि जी सोच-विचार जी ताकत रांदि सां वधन्दी आहे। ऐतड़ो इ न बल्कि तोतला बार बि रांदि जे जोरु ते तकड़ो गाल्हाइण शुरू कन्दा आहिनि। आड़े-पाड़े जे या स्कूल में पढ़हन्दड़ बियूंनि समाजनि ऐं बोलिनि वारे बारनि जी बोली बुधी बारनि जो शब्दकोश वधन्दो आहे। सेहत सुठी रहन्दी आहे। रांदि में रीस हुजण या चट्टाभेटी में खटण जी मुराद सां बार हिकु बे खां अगिते वधण जो जज्बो रखन्दा आहिनि ऐं इयो त जग जाहिर आहे, हौड़ या रीस या चट्टाभेटी या प्रतियोगिता या प्रतिस्पर्द्धा जी भावना माण्हूअ जे विकास में सहकारु कन्दी आहे। हा, इया गाल्हि हमेशा यादु रखजे कि रांदि हमेशा रांदि जी भावना सां ई कजे। त हाणे सडु कयो बारनि खे, अचो बारओं रांदि कयूं। जय झूलेलाल। – मोहन थानवी
मंडक मंडी गुडो ऐं गुडी
इनसान जडहिं झंगली जीवन में बि खुश हो तडहिं बि बारनि लाइ रांदि रूंदि विन्दराइप जो जरियो हुवा। कयासु कयो, हिक झंगली माण्हू पहिंजी घरवारीअ सां वण हेठां वेही अम्बु खाए थो ऐतिड़े में उनिजे नन्ढुड़े बार खे कीवली अची चकु पाये थी। जाहिरु आहे, बार रोई पियो। झंगली माण्हूअ ऐं उनिजी घरवारीअ बार खे चुप कराइण लाइ छा उपाइ कयो हुन्दो! सांई, सभिनी खां सहूलो उपाइ उननि लाइ उनि वक्तु इयो इ थी सघन्दो हो, उननि चूस्यलि अम्बु जो खखरो बार खे झलाये छज्यो। उनिजे साम्हू अजीबु अजीबु शिक्ल ठाहे उनिखे खिलाइण जी कोशिश कयावूं ऐं कामयाबि थिया। बस, हितां खां ई बारनि लाई रांदि-रूंदि जी शुरुआत थी वेई। अम्बु जो खखरो अगिते हली करे गुडो-गुडीअ जे रूप में विकसित थिया। इनि रूप खे कठपुतली बि चई था सघूं। गुडो गुडी महजु विन्दराइपु जो जरियो ई न रहिया आहिनि बल्कि अजु जे जमाने में इननि जे आधार ते जुदा जुदा सूबनि, देशनि ऐं जाति-समाज जे बारे में बारनि खे जाण डिनी थी वंञे। सामाजिक ऐं सांस्कृतिक जाण लाई गुडे गुडीअ जो इस्तेमालु सजे संसार में थीन्दो आहे। ऐहिड़ेई नमूने कुझु बियूं रांदियूं माण्हूनि बणाये वड़तियूं। माण्हू सभ्य थीन्दो वयो, रांदियूं बि सिख्या डिहण वारियूं ऐं दिमागी तौर बारनि खे होशियारु बणाइण वारियूं ठहन्दीयूं वयूं। इनि सां गडोगडु शारीरिक रूप सां बि बारनि जी कसरत थी वंञे ऐहिड़ी रांदियूं बि बेशुमार ईजादु कयूं वयूं। ऐहिड़ी ही हिकु रांदि आहे मंडक मंडी। हिन्दी क्षेत्रनि में इनि रांदि खे लंगड़ी टांग चवन्दा आहिनि। हिक गोल घेरो ठाहे उनिमें हिकु ग्रुप जा पंज-सति बार घिरन्दा आहिनि। बे गु्रप जो हिकु बार पहिंजी वारीअ ते मंडो थी करे उननि बारनि खे पकड़न्दो आहे, जहिं बार खे उनिजो हथ लगी वंञे, उव्हो आउट। इया रांदि न सिर्फु बारनि जी शारीरिक ताकत वाधाइन्दी आहे बल्कि चुस्ती-फुर्ती ऐं मौके जी नजाकत अनुसार पहिंजो पाण खे बचाइण ऐं साम्हूं वारे खे झले वठण जो सुठो अभ्यासु बि कराइन्दी आहे। इनि करे ई स्कूलनि में पढ़ाई कराइण सां गडु खेलकूद जो पीरियड बि लाजिमी तौर ते लगायो वेन्दो आहे। जय झूलेलाल। – मोहन थानवी
किस्म-किस्म जूं रांदियूं
घणनि किस्मनि जूं रांदियूं असांजी जाण में आहिनि। सिन्धु में त बार इननि रांदियूंनि खे पहिंजी सहूलाईअ सां खेडन्दा हुवा। हाणे बि किन्हनि गोठनि में या नगरनि जे पाड़नि में बार रांदि कंदे डिसण में अची वेन्दा आहिनि। जेकडंहिं तव्हा जे पाड़े में बारनि खे रांदि करण जी सहूलियत लाइ मैदान या बागीचो आहे त उननि खे रांदि लाई जरूर हिमथायो। रांदि जूं ऐहिड़ियूं किस्मां बि आहिनि जे के बार अकेलाईअ में बि खेडे था सघनि। बियनि बारनि खे खेडन्दो डिसी कुझु बार उननि जी नकल कन्दा आहिनि, अकेले में खेडण वारी ऐहिड़ी रान्दि खे समानांतर रांदि चवबो आहे। जे के रांदियूं बार पाण में गडिजी करे खेडन्दा आहिनि उननि खे सहकारी रांदियूं चयो वेन्दो आहे। इनि किस्म जी रांदियूंनि में बार पहिंजा रांदिका मट-सटि कन्दा आहिनि, गडुजी करे खेडन्दा आहिनि। चटाभेटीअ वारियूं रांदियूंनि में कबटी, खोखो, वालीबाल वगैरह शामिल आहिनि। बियूं बि घणीयूं रान्दियूंनि जी चटाभेटी थीन्दी आहे। हिकु हिकु बार या गु्रप में बंधलि बार ऐहिड़ी चटाभेटी खटी करे डाढ़ा खुश थीन्दा आहिनि। इनि सां बियूंनि फाइदनि सां गडोगडु सहकारु जी भावना विकसित थीन्दी आहे। कुझु रांदियूं बार वडनि सां खेडन्दा आहिनि। ऐहिड़ीयूं रांदियूं घणो करे नंढिड़ी उमरि वारे बारनि लाई ईजादु थियूं। इननि सां बार खे चुस्ती-फुर्ती ऐं गाल्हियूं-बोल्हियूं करण में हुशियारी इन्दी आहे। घणीयूंई रांदियूं छोकरनि-छोकिरियुनि जूं जुदा-जुदा थीन्दीयूं आहिनि। कुझु रांदियूं छोकरा-छोकिरियूं गडुजी करे खेडन्दा आहिनि। घर में या घर खां बाहिरु खेडण वारियूं रांदियूंनि जी फेहरिस्त बि आहे। कुझु रांदियूं त ऐहिड़ियूं बि आहिनि जिननि में गीत-संगीत जो लुत्फ बि बार वठन्दा आहिनि। गडोगडु वडनि खे बि गीत गाइण जो वंझु मिलन्दो आहे। त सांईं, डिठव, रांदि महज रांदि नाहें। रांदि पहिंजे पाण में ज्ञान जो भंडार ऐं शरीर खे फुर्त बणाये रखण जो जरियो बि आहे। जय झूलेलाल। – मोहन थानवी
रांदियूं ऐहिड़ियूं जे के खुटनि ई न
पुरातन काल में बि रांदियूंनि जी महत्ता सिन्धु संस्कृतिअ जाणे-सुञाणे वड़ती हुई। तंहिं करे ई पदम चरित में बि रांदिनि बाबत खुलासो मिले थो। पदम चरित में चेष्टा, उपकरण, वाक क्रीड़ित ऐं कला वियसन किस्म जियूं रांदिनि बाबत तफसील आहे। इननि जे मुजिब बारनि खे खेडण महिल जे के साधन खपनि, या उननि खे जे के जतन करणा था पवनि, उन्हींअ ई रीति रांदिनि जा किस्म चेष्टा वगैरह चवाया विया। इये रांदियूं ऐतिड़े कदुरु आहिनि जो हिक फेहरिस्त ठाहियूं त खुटनि ई न। तरहां तरहां जूं रांदिनि बाबत फकतु पदम चरित ई न बल्कि रामायण ऐं महाभारत में बि जिक्र आहे, नमूने तौर बुधो त मल्ह युद्ध यानी कुश्ती, धनुष्य-बाण, शिकार, रथ-डोड़, तलवारबाजी जी मिसाल काफी आहे। हिति पंचतंत्र जो जिकरु करिण वाजिबु लगे थो। पंचतंत्र भारतीय साहित्य जो उवो माणिक-मोती आहे जिन्हं जो उथलो (अनूवाद) दुनियाभर जी भाषाउनि में कयो वियो आहे। पंचतंत्र जी आखाणियुंनि में कठपुतलीअ जो जिक्र आहे जंहिंखे सूत्र क्रीड़ा चयो वेन्दो हो। तव्हां खे जाणे करे हैरत थीन्दी कि बॉल कोई आधुनिक काल जी ईजाद नाहें बल्कि महाभारत काल में बि काठ जे बाल सां खेडियो वेन्दो हो। इनि रांदि खे कंदोक नाले सां पुकारीन्दा हुवा। चमड़े में अगिड़ियूं भरे करे बाल ठाहे बि खेडन्दा हुवा। अजु जे जमाने में रबड़ जे बाल सां बार रांदि कन्दा आहिनि। सिन्धु सभ्यता जी महानता जी जाण रांदिनि जी तफसील सां बि असीं समझी था सघूं। मिसाल तौर इटी-डकरु रांदि जहिंखे हिन्दीअ मंझ गुल्ली डंडा चवबो आहे, सिन्धु जी झूनी रांदिनि मूं हिक आहे। मजे जी गाल्हि इया बि आहे कि दुनियाभर में धूम मचाइण वारी क्रिकेट इन्हींअ ई इटी-डकरु जो सुधिरियलि रूप मनी हलण में को शकु शुबुहा न थो निजरे। प्राचीन काल में इन्हींअ खे वीटा-क्रीड़ा नाले सां माण्हू जाणन्दा हुवा। सचुपचु हैरत थीन्दी आहे कि झूने जमाने में बि रस्साकशी रांदि खेडी वेन्दी हुई। इनिखे यशटीकारशण नाले पुकारीन्दा हुवा। रांदिनि बाबत ऐतिड़ी जाण खां पोइ हाणे तव्हां बि चई था सघो, असांजी सिन्धियत बाकी सभिनी सभ्यताउंनि खां झूनी आहे। हा, इनिखे जिन्दह रखण लाइ असांखे हाणे उथी खड़ो थिअण जरूरी आहे। अचो, उथो जागो त पहिंजी इनि सिन्धु खे ठाहियूं। जय झूलेलाल। – मोहन थानवी
कुकुडू़ कू मूखे सुहिणो लगें तूं
बारनि जियूं रांदियूं वडनि जो मनु बि छिकन्दीयूं आहिनि। अगूठो सांसद ऐं सिनेमा स्टार धर्मेन्द्र पंजाबी कलाकार आहे लेकिन उनिजी हिन्दी फिल्म ज्वार भाटा जो गीत आहे, कुकुड़ू कू बड़ा प्यारा लागे तू…। डिसो, असाजी लोक रांदियूंनि में हिक रांदि आहे, कुकुड़ू कू…। नन्ढुड़ी उमिर जे बारनि लाई ईजादु थियलि इया रांदि न सिर्फ बार ऐं उनिजी माउ या वडनि जी विन्दराइपु आहे बल्कि बारनि जी बुधण जी क्षमता सां गडोगडु उननि पखिनि ऐं जानवरनि जी आवाजु सुञाणणि जो ज्ञान बि वधाइन्दी आहे। कुकुड़ू कू आवाज कन्दो आहे कुकुड़ू। इन्हींअं ई नमूने झिरकी चीं चीं कन्दी आहे। कांव, कोयल, गाइ, हवाई जहाज जो आवाज बि बार इन्हींअ रांदि जे सदके सुञाणे वेन्दा आहिनि। दरअसलि घर जा भाती बार जे भरिसां या कन में जोर सां चवन्दा आहिनि, चीं चीं, कांव कांव या कुकुड़ू कू…। बार खुश बि थीन्दो आहे ऐं घर जे दालान में घुमण वारनि पखिनि ऐं गाइ, बकिरीअ खे डिसी उनिजी आवाजु कढ़ी पहिंजी सुञाणपु बाबत असांखे इशारो कन्दा आहिनि। सांई, असांजी सिन्धु सभ्यता में न सिर्फु जीवन सुहिणे तरीके सां जीअण जी सिख्या डिहण वारियूं परम्पराउं आहिनि बल्कि दुनियादारीअ में रोज कमु अचण वारियूं गाल्हिनि सां गडु नन्ढुड़नि बारनि खे होशियारु बणाइण वारियूं रांदियूं बि आहिनि। गाल्हि हिन्दी सिनेमा स्टार ऐं अगूठे सांसद धर्मेन्द्र जी कई से त हिति उन्हींअं जी इन्हींअं ई फिल्म ज्वार भाटा जो हिकु बियो गीत बि यादु अचे थो, दाल रोटी खाओ प्रभु के गुण गाओ…। तव्हांखे जरूर पहाको यादु आयो हुन्दो, दाल टबर पाल। जय झूलेलाल। – मोहन थानवी
हिम्मथ-ए-मर्दां मदद-ए-खुदा
हयातीअ मंझ सुख-दुख उसि-छांव वांङुरु अचे-वंञे थो। हिम्मथी उव्हो माण्हू चवाइबो आहे जेको गुलनि ऐं कंडनि सां भरियलु दगनि में हिक जहिड़े हौसले सां हली पहिंजी मंजिल हासिल करे वठन्दो आहे। तडहिं त चयो वियो आहे, हिम्मथ-ए-मर्दां मदद-ए-खुदा। मजे जी गाल्हि बुधो, बारनि जी रांदियूं बि ऐहिड़ो ई न्यापो पाण में पिरोइलि रखन्दीयूं आहिनि। मिसाल तौर नांगिणि जी रांदि। इनि रांदि में बार खे जल्दी मथे पहुंचण ऐं नांग जो धकु खाई पट तांई पहुंची वंञण जे सुख-दुख जो अहसास थीन्दो आहे। उनिखे रांदि रांदि में सिख्या मिलन्दी आहे कि हयातीअ में असांजा कयलि बेहतरीन कम असांखे मथे चाड़ीन्दा आहिनि। खराब कमनि जे करे असीं पुठिते धिकिजी वेन्दा आहियंू। लेकिन हिम्मथ बंधी रखण सां हलण वारो तयशुदा सुठा कम ई करे हमेशा मंजिल तांणी सफलता सां पहुंची वेन्दो आहे। इनिखे अजु जा बार सांप-सीढ़ी नाले सां सुञणन्दा आहिनि। लेकिन जाणीकारनि जे मुजिबु इया रांदि झूने भारत जे ज्ञान चौपाट रांदि जो सुधिरियलि रूप आहे। क्रीड़ा कौशल्य नाले सां मशहूर हिक ग्रंथ में जाण आहे त ज्ञान चौपाट रांदि महाराष्ट्र जे मशहूर संत ज्ञानेश्वर माण्हूनि में हलाई हुई। ऐहिड़ी आहे असांजी पुरातन सभ्यता जी महत्ता। इनि करे असीं आह्वान कयूं था कि तव्हां पहिंजे बारनि तोंणी पहिंजी सिन्धु सभ्यता जी जाण हर तरीके सां पहुंचायो। बारानि जूं रांदियूं बि इनिजो जरियो बणी थियूं सघनि। जय झूलेलाल। – मोहन थानवी
भजु ड़े कूआ बिल्ली आई
ऊनारे जी मोकलियूं बारनि लाइ सैल करण लाई थीन्दीयूं आहिनि। माण्हू सिन्धु में त मीहंु जी मुंद में गोठ (सैल) कन्दा हुवा। वाहु जे भरिसाण पहिंजनि साधननि सां पहुंची करे बारनि सां गडुजी पकवान खाइन्दा ऐं रांदियूं कन्दा हुवा। रांदि कोई बि हुजे, उनिसां बारनि खे लाभु ई मिलन्दो आहे। अजु जो जमानो मटजी भले ई वियो आहे लेकिन माण्हुनि जी फितरति हर गाल्हि सां भेटे डिसजे त अंञण पहिंजी परम्पराऊंनि सां गंढयलि आहे। गोठ खे असीं अजु पिकनिक चवन्दा आहियूं। वाहु यानी नदी किनारो जंहिं शहर में आहे उतूं जा माण्हू उते वंञी मौज लगाइन्दा आहिनि। जिननि शहरनि में नदी कोने, उते कुझु ऐहिड़ा बिया स्थान जरूर आहिनि जिथे वंञी माण्हू बारनि-बचनि सां सैर-सपाटा करे सघे। ऐहिड़नि मौकनि ते बि बार रांदि करण जी पहिंजी फितरति सां गंढयलि रहिन्दा आहिनि। हाणे इयो जरूरी कोने कि सभिनी रांदियूंनि में असीं पहिंजी विरासत खे गोल्हियूं। छो जो कुझु ऐहिड़ीयूं रान्दियूं बि आहिनि जेके सभिनी प्रांतनि में खेडियूं वेन्दीयूं आहिनि। जीअं त भजु ड़े कूआ बिल्ली आई। इया ऐहिड़ी रान्द आहे जेका घर में बि ऐं बाहिरु बि वडनि सां गडु बार खेडन्दा आहिनि। बागीचनि में, गोठ या पिकनिक स्पाट ते, घिट्टीअ में या स्कूल में, सभिनी जगहनि ते इनि रांदि खे करे सघण जी सहूलियत आहे। इनि रांदि में बारनि खे भज-डुक करणी पवन्दी आहे। सो जाहिरु आहे, उननि खे कसरत जो अभ्यासु थीन्दो आहे। पहिरिये-बें दरजे में पढहन्दड़ बार खे कूअे ऐं बिल्ली जे सुभाव जी जाण बि मिली वेन्दी आहे। घणो करे बार बिल्लीअ जी आवाज बुधी डकन्दा आहिनि, सो ऐहिड़ी रांदि सां उननि जे मन में वेठलि डपु बि घटि थीन्दो आहे। मनोवैज्ञानिक नजरिये सां इनि तरहां जूं रांदियूं बारनि जो दिमागु खोलीन्दियूं आहिनि। तव्हां खे बुधायां कि गुजरात में इनि रांदि खे कूए ऐ कुईअ जी रांदि पुकारीन्दा आहिनि। जय झूलेलाल। – मोहन थानवी
रांदीगरु रीस करे पर हूस न करेे
रांदि खेडण में ऐं रांदि जूं गाल्हियूं करण में नन्ढ़नि खां वठी वडनि तांेणी सभिनी खे लस्त इन्दी आहे। छोकरो हुजे या छोकरी, जाइफां हुजे या मर्द, जवान हुजे या पौड़ो, सभई कंहिं न कंहिं रूप में रांदि जा शौकीन हुन्दा आहिनि। रांदि जो शौक सुठो बि आहे छो जो इनिसां बारनि ऐं जवाननि में बियूंनि खां अगिते निकरण जी भावना पैदा थीन्दी आहे। हिन्दी में चयो वेन्दो आहे, खेल को खेल की भावना से खेलना चाहिये। सिन्धीअ में चवणी आहे, रीस कजे पर हूस न कजे। इनिखे रांदि सां बि असीं गंढ़े था सघूं। रांदीगरु रीस करे पर हूस न करे। बिए जहिड़ो थियण या उनिखां बेहतर थियण जी कोशिश करण सुठो चवाइबो लेकिन उन सां हसदु-साड़ु न रखजे। रांदि जो कमु हमेशा सुठा ऐं सकारात्मक विचार पैदा करण जो आहे। जे कंडहिं माण्हूं रांदि-रांदि में हिकु बे सां रुसन्दो त उनिजो असरु घर में, पाड़े में, समाज ऐं सजे गोठ ते पवन्दो। तडंहिं त वडनि चवणी में इशारो कयो आहे, रूठी आहे घोट सां, गाल्हाए नथी गोठ सां। खैर, गाल्हि आहे बारनि जी रांदि जी त हिति कुझु रांदिनि जो जिकरु कयूं था। चोर-सिपाही नाले जी रांदि चार बार गडुजी करे घर में बि खेडे था सघनि। इन्हींअ रांदि में गुजिरियल जमाने जे राजदरबार बाबत जाण बि बारनि खे सहूले नमूने मिली थी वंञे। रांदि करण जो तरीको सहूलो आहे। हिक पने जा चार टुकड़ा करे उननि ते चोरु, सिपाही, राजा ऐं वजीर लिखी करे वेढ़े करे गडुजाएजे। पन जी उननि चइनि चुटिकियूंनि खे पट यानी फर्श ते उछले चारई बार हिक-हिक चुटिकी खणी वठनि। कुल डहि दफो इयं कजे ऐं हर दफे जहिं बार वटि राजा-वजीर वगैरह लिख्यलि आयो, उनिजे मुताबिक गिणजे ऐं जेंहिं वटि सभिनी खां वधीक दफा राजा लिख्यलि आयो हुजे उव्हो बणजी वेन्दो राजा। ऐहिड़ेइ नमूने वजीर, सिपाही ऐं चोरु बि बणन्दा। ठीक राजदरबार वांङुरु चोर खे सिपाही झलीन्दो, वजीर राजा अगियूं उन्हींअ जो डोहु बुधाइन्दो ऐं राजा न्याय करे चोरु लाइ सजा मुकर्रर कन्दो। बाराणी रांदि मुजिबु सजा थी सघन्दी आहे, सभिनी खेे कुल्फी खाराये या गीत गाए या नची डेखारे। रेलगाड़ी ऐहिड़ीं रांदि आहे जंहिंखे बार सामूहिक रूप सां घर जे दालान या आड़े-पाड़े में खुली जगहंनि ते खेडन्दा आहिनि। इनिजी तफसील लाइ कालम में जगह बि वधीक खपे। इनि करे सांई सुभाणे वड़ी गडुबा से, रेलगाड़ी सां गडु। जय झूलेलाल। – मोहन थानवी
बारओं, अचो वेहो रेल में
सभिनी सां प्रेम करण सेखारे रेलगाड़ी, मुहिंजी रेलगाड़ी
भारतीय रेल सजी दुनिया में इनि करे बि मशहूर आहे जो इनि में सभिनी जाति-समाजनि जा माण्हू गडुजी करे सफरु कन्दा आहिनि। सभिनी माण्हूनि सां प्रेम करण जो संदेश रेलगाड़ी सां मिले थो। हवाई जहाज, रेलगाड़ी ऐं ऐहिड़ीयूंइ बियूं शयूंनि जे बारे में बुधी करे बार उननि बाबत सुवाल जरूर पुछन्दा आहिनि। कुझु बार पहिंजी जाण मुजिब बियूंनि बारनि खे हवाई जहाज ऐं रेलगाड़ी जे सफरु बारे में बुधाइन्दा आहिनि। इनि रांदि सां बारनि में होशियारी वधन्दी आहे। अणजाण माण्हू सां बि सिक-प्रेम रखण जी सिख्या मिलन्दी आहे। बारनि खे रेलगाड़ीअ बाबत वधीक जाण मिली सघे। बारनि खे ऐहिड़ी रांदि करण जो वंझु स्कूल में भी मिले त मास्तरनि जी निगरानीअ में इनिखे तमामु सुठे नमूने मंचित बि करे था सघनि। बारनि जी मेहनत खे डिसी नाटक डिसण वारा कला पारखी जरूर इनाम-इकरामु बि डिन्दा आहिनि। कुझु ऐहिड़ीयूंई बियूं रांदियूं बि आहिनि। मिसाल तौर भेज मौला। खास तौर मीहुं वसण महिल बारनि जी खुशी इनि रांदि में निजर इन्दी आहे। मीहु वसे त बारनि खे भिजण सां रोके सघण वडनि जो कमु कोने। बार नचंदा-टपंदा ऐं गाईंदा मीहुं में भिजन्दा खूब मस्ती कन्दा आहिनि। भेज मौला, चांदी का गोला, भेज मौला चांदी का गोला। हा, बार इया रांदि बरसात महिल ई खेडे सघन्दा आहिनि। लगरु चाड़ण बि हिक ऐहिड़ी रांदि आहे जहिंमें बार खादो-पीतो बि वेसारे छडन्दा आहिनि। ऐतिड़ो ई न बल्कि लगरु चाड़ण जी धुन वडनि तेभी सवार थी वेन्दी आहे ऐं आकास में चारई डाहुं लगरु ई लगरु निजरीन्दा आहिनि। लगरु यानी पतंग। पतंगबाजी जी रांदि जुदा जुदा नगरनि में जुदा जुदा मौकनि ते पहिंजी रंगत डेखारीन्दी आहे। जयपुर में मकर संक्रांत ऐं बीकानेर में आखातीज जे डीहुं खूब लगरु उड़ामंदा आहिनि। अजमेर, अहमदाबाद, लखनउ वगैरह नगरनि में बि लगरु उडाइण जी परंपरा आहे। हा, इनि रांदि जो कंहिं न कंहिं खास मौके सां संबंध आहे। खास तौर नगर स्थापना जे डीहुं लगरु उडाइण जी परंपरा घणनि नगरनि में अजु बि हले थी। ऐहिड़ीयूं रांदियूं बियूं घणियूंई आहिनि जिननि सां असांखे पहिंजी परंपराउनि सां वाकफियत वधाइण जो वंझु मिलन्दो आहे। नाटक बि ऐहिड़ी ही हिक कला आहे जहिंखे बार पाण में रांदि तौर बि खेडन्दा आहिनि। रेलगाड़ीअ जी रांदि उननि मूं हिक आहे। त सांई, अर्जु आहे कि बारनि खे पहिंजी सिन्धु संस्कृतिअ जी जाण रांदि रांदि में डियण जो उपाय अजु खांई शुरू करे छड्यो। जय झूलेलाल। – मोहन थानवी
बालपण खां बुढ़ापे तोणी कयो रांदि
असांजी सिन्धु संस्कृतिअ जो ई महताव आहे जो सजी दुनिया में असंी सिन्धी मशहूर थिया से। इनिजी वजह आहे, असांजे वडनि जी मेहनत। हा, सिन्धु भूमिअ ते जन्म वठण वारनि ऋषिनि-मुनिनि हयातीअ में अचण वारी लाही-चाड़ी (उतार-चढ़ाव) यानी सुख-दुख खे ध्यान में रखी सिन्धी समाज जे माण्हूनि जी शारीरिक ऐं मानसिक ताकत वधाइण ऐं बणाए रखण जा तमाम सहूला नुस्खा गोल्हिया। उननि नुस्खनि खे विज्ञान जे नजरिये सां विकसित कयावूं। जीअं योगाभ्यास। ऐहिड़ेई नमूने रांदियूं। 1- ली ली लावां, इनि रांदि में वडा मथीं जगह ते वेही करे बारनि खे पहिंजे पैरनि ते वेराहे करे झुलाइन्दा ऐं ली ली लावां गाइन्दा आहिनि। इनि रांदि सां झूलण महिल बारनि खे पहिंजे शरीर जो संतुलनि बणाए रखण, झूलन्दे वक्तु उथी बिहण, वेहण वगैरह जी अटकल अची वेन्दी आहे, यानी उननि में होशियारी इन्दी आहे। 2- पेरड़ो पंधड़ो, इया रांदि बारनि खे पहिंजे जोर ते उथी वेही ऐं हली सघण सेखारण लाइ ही ईजाद थी हून्दी। 3- हलु हलु घोड़ा, इनि रांदि में बारनि जी विन्दराइपि सां गडु उननि खे घोड़े जेहिड़े जानवर बाबत जाण मिले थी। अजु जो जमानो बाइक सवारीअ जो आहे। लेकिन कंहिं जमाने में घुड़सवारी अचण तमाम जरूरी हुई छो जो दुश्मन जे लश्कर सां विरहणनि लाइ सिपाहिनि खे घोड़नि ते लड़ाईअ जे मैदान में वंञणो पवन्दो हो। सो, बारनि खे नन्ढुपण में ई ऐहिड़ा संस्कार मिलन्दा हुवा जो हू पहिंजी मातृभूमिअ जी रक्षा लाइ तियार थी वेन्दो हो। दरअसलि बार गाल्हाइण सिखंदे सिखंदे पहिंजी नानी-दादी, मासी, मामी या नाना-दादा जे इशारनि खे बखूबी समझी वेन्दो आहे छो जो घणो वक्तु उन्हनि सां ई गुजारीन्दो आहे। वडा बि बारनि खे कच्छ में खणी खणी केतरो खणन्दा! सो कुदरती तौर वडा बि बारनि सां रांदि करे वक्तु सजायो कन्दा आहिनि। पहिंजी कच्छ जे बार खे कडहिं पैरनि ते झुलाइन्दा त कडहिं पाण घोड़ो बणजी बारनि खे सवारु बणाइन्दा। उननि सां गाल्हाइण बि सजायो कन्दा, उव्हो ईअं कि उननि खे पखिनि, जिनावरनि ऐं पहिंजे शरीर जे अंङनि जी जाण डीन्दा वेन्दा। पींघे में लुडन्दो बारु बि पहिंजे आसे-पासे जी शयूंनि ऐं आवाजुनि खे ध्यान सां बुधन्दो आहे। इतांइ उनिमें पहिंजे परिवार-समाज जा संस्कार विकसित थीन्दा वेन्दा आहिनि। इनि करे रांदियूं पहिंजे पाण में खासियतुनि सां भरपूर आहिनि। पींघे खां वठी स्कूल वंञण जी उमिर तांई खेडण वारियूंनि कुझु रांदियूं सां गडु वड़ी सुभाणे मिलन्दा सीं। जय झूलेलाल।
मछी मानी केरु खाई वियो !
रांदि जा फाइदा बेशुमार आहिनि ऐं तव्हां इननि सां वाकिफ आह्यो। लेकिन नई टहीअ खे पहिंजी सिन्धु लोक रांदिनि बाबति जाण तमाम घटि आहे। कुझु बारनि खे त इनि बाबत बिलकुल बि जाण कोन्हे। डिसण, बुधण ऐं खेडन्दे वक्तु खसीस लगण वारी रांदि बि पहिजे पाण में केतरो वडो मनोवैज्ञानिक नजरियो समाइलि हुन्दी आहे, इनि जो हिक मिसाल पेश आहे, मछी मानी केरु खाई वियो ! सचपचु बारनि खे पहिंजे वातावरण ऐं प्रकृतिअ जे दोस्तनि बाबत जाण डिहण जो ऐहिड़़ो लाजवाब तरीको असांजे वडनि ईजादु कयो, इनिते असांखे फखरु करण घुरुजे। डिसो, बारनि खे इनि रांदि जे बहाने मोरु, कांव, हिरण, गाइ, कीवली, झिरकी वगैरह पखिनी ऐं जानवरनि जा नाला त यादि थीन्दा ई आहिनि गडोगडु इअे ऐं बिया जीव खाइन्दा पीअन्दा छा आहिनि, इया बि जाण उननि खे मिलन्दी आहे। इनि जे अलावा बारनि जी शारीरिक संवेदनशीलता ऐं उननि जे शरीर जे अंङनि जे सही तरीके सां कमु करण बाबत जाण बि वडनि खे सहूले तरीके पइजी वेन्दी आहे। इनि रांदि में वडा बार खे साम्हू वेराहे करे उनिजो हथ झलन्दा ऐं आंङुरियूंनि बाबत पुछन्दा आहिनि, चीच, बाच, विचीं ऐं डसिणी…. हीअ आंगूठो। इननि आंगुरियूंनि खे ई रांदि जो जरियो ठाहे करे तरहां तरहां जियूं शयूंनि जा नाला वठी पुछन्दा आहिनि, घाहि केरु खाई वियो…. गाइ। रोटी केरु खाई वियो…. कांव। दुदु केरु पी वियो… बिल्ली। मछी मानी केरु खाई वियो….! ऐहिड़े नमूने घणनि शयूंनि ऐं जानवरनि जा नाला वठी बार जी कछ में कितकिताउं बि कन्दा आहिनि। कितकिताउं करण सां बार जे शरीर जी संवेदनशीलता जी खबरु पवन्दी आहे। ऐहिड़ीयूं धणियूंई रांदियूं आहिनि, कुझु रांदिनि बाबत मानवारा डा हूंदराज बलवाणी साहिब पहिंजी किताबु बारनि जूं लोक रांदियूं मंझ खुलासो कयो आहे। इया किताबु सिन्धी अकादमी दिल्ली पारां सालु 1992 ऐं देवनागरीअ में 1998 में प्रकाशित थियलि आहे। कुझु रांदिनि जा नाला, 1- इरिचिक मिरिचिक 2- अखिबूट 3- पींघ 4- नोड़ीअ रांदि 5- असीं बेर चूंडण अचूं था 6- ईसी डे मोरी डे 7- इकड़ी-दुकड़ी 8- कलाबाजी 9- तीर कमान 10- इटी डकरु ।
नेता चवे थो, अंत अखरी
हा, नेता चवे थो, अंत अखरी। सचपचु अजु जा राजनीतिक हालात ऐहिड़ाई आहिनि जो जनप्रतिनिधिनि जी बोली अंत अखरी रांदि वांङुरु लगे थी। हिकु नेता जंहिं गाल्हि खे उछालीन्दो आहे, बियो नेता झट उनि गाल्हि खे झले करे अगिते छिकन्दो आहे। इनि छिकि-झोरु में वेचारी जनता इन्हींअ में ई खुश थी वेन्दी आहे कि उनहींअ जो नेता न चवण खां कुझु त चवे थो। दरअसलि असांजी सिन्धु संस्कृति ऐं परम्पराउंनि में सामाजिक ऐं राजनीतिक हालातुनि जो असरु बि डिसण में अचे थो। इनि गाल्हि जी सचाईअ तौर हिति इननि रांदियूंनि खे मिसाल बणाए पेश कयूं था। दरअसलि नेता चवे थो हिक रांदि जो नालो आहे। अजुकल बि इनि रांदि खे कब-बुलबुल स्काउट एनसीसी कैडेट खेडन्दा आहिनि लेकिन सिन्धी समाज जी इया रांदि हाणे पहिंजे ई ईजादु कयलि माण्हूनि जे बारनि लाइ अणजाण रांदि बणजी वेई आहे। इनि रांदि में बिनि टोलिनि में विरहायलि बार पहिंजे नेता जे इशारे ते हलन्दा आहिनि लेकिन साम्हू वारी टोलीअ जे मेम्बरनि खे खबरु न पवण घुरुजे कि बीअ टोलीअ जो नेता केरु आहे। जे कडहिं नेता सुञाणपु में अची थो वंञे त उव्हा टोली हाराइजी वेई। इनि रांदि में खिल मजाक त खूब थीन्दी आहे, गडोगडु बारनि जे अनुमान लगाइण जी क्षमता बि वधन्दी आहे। अंत अखरी रांदि बाबत नई टही बखूबी जाण रखन्दी आहे लेकिन इनि रांदि जो स्वरूप मटिजी वियो आहे; इनि करे इनिजो मकसदु बि फिरी वियो आहे। दरअसलि अंत अखरी सिन्धु में धार्किक श्लोका, मंत्र, गीता पाठ, तुलसी चौपाइयूं वगैरहनि खे यादु करण जे मकसद सां स्कूलनि में खेडाई वेन्दी हुई। इनि सां गडोगडु साहित्यिक ऐं सूफीयाना रचनाउं बि बारनि खे यादु करण में मददु मिलन्दी हुई। इनिजो फाइदो इयो मिलन्दो हो कि बार पढाईअ में होशियारु बणन्दा हुआ। अजु बि घणनि जगहनि ते इनि रांदि सां सकारात्मक नतीजा हासिल कया था वंञनि लेकिन चिंता जी गाल्हि इया आहे कि स्कूली गतिविधिनि में अंत अखरी रांदि हाणे करीब करीब बंद आहे या सिनेमा जे गीतनि सां खेडन्दा आहिनि। उथो जागो त पहिंजी सिन्धु जी एहिड़िनी विरासतनि खे संभारुं, नई टहीअ तांई पहुंचायूं। जय झूलेलाल। – मोहन थानवी
चिदा करे विया लिक-छिप
चिदा रांदि अजु गोठनि में बि बार पूरे जोश सां कोन था कनि। हा, चिदनि जी रांदि अंञण खेडी वेन्दी आहे लेकिन इनिजो स्वरूप सिकुड़ी वियो आहे। चिदनि सां बार घणनि तरीकनि जी रांदि कंदा हुआ। तव्हां खे हैरानी थीन्दी कि अजु मिलण वारा रंगबिरंगा चिदा कंहिं जमाने में गोलीअ वारी सोडा वाटर जी बोतल मूं कढ़ी करे रांदि कबी हुई। वक्तु वक्तु जी गाल्हि आहे। चिदनि रंगबिरंगो स्वरूप बि हासिल कयो ऐं अजु बि चिदनि रांदि बारनि में मशहूर आहे लेकिन वडनि शहरनि में त न जे बराबर। लगे थो चिदा लिक-छिप कनि था। असलि में चिदा रांदि बंद कमरे खां वठी खुले मैदान में बि कई वेन्दी आहे। मैदान में इनि जी रांदि खे मथीं रांदि, हेठीं रांदि नालनि सां खेडन्दा आहिनि। इन्हींअ रांदि सां निशानेबाजीअ में बार होशियारु थीन्दा आहिनि। हा, लिक-छिप अजु बि बारनि में मशहूर आहे। कुझु जगहनि ते इन्हींअ रांदि खे आईस-पाईस चयो थो वंञे। रांदिनि जी खासियतूनि बाबत पहिरियूं घणो कुझु बुधाइलि आहे इनि करे उनिखे दोहराइण जे बदरां हित कुझु रांदिनि जा नाला बुधायंू था जेके बारनि जे विकास लाइ बि सुठियूं आहिनि। 1- कबटी, बारनि जी शारीरिक ताकत ऐं पकड़ वाधाइण में मददुगारु। 2- खो-खो, बारनि जी डुक-डौड़ जी क्षमता वाधाइण में इनि रांदि जो महताव आहे। 3- फिर फिर सौंटा,े करीबनि खो खो जेहिड़ी इया रांदि अफगानिस्तान में बि बार अताले ताल नाले सां खेडीन्दा आहिनि। इनि रांदि में बार गोल घेरो ठाहे वेहीन्दा आहिनि ऐं होशियारीअ सां आग (वारी कन्ढीन्दड़) डिन्दड़ बार ते नजर रखन्दा आहिनि कि उनि सौंटो यानी को रुमाल या कपड़ो उननि जे पुठ्यां त कोन रख्यो आहे। जे उननि जे पुठ्यां सौंटो रख्यलि हुन्दो आहे त उव्हे उथी आग डीन्दा आहिनि। ऐं बार खे सौंटो रखण जी खबरु कोन थी पवे त आग डिन्दड़ बार उन्हींअ ई सौंटे सां उनि बार खे मार डीन्दो आहे। 4-खस्तो पंजो, पंजनि बारनि जी टोली इया रांदि कन्दी आहे। बार गोल घेरो ठाहे पंिहंजा पंजा जमीन ते रखी खूब मजे सां इनि रांदि सां विन्दराइपि कन्दा आहिनि। 5- मुठि वार ग्रांठ, इनि रांदि में बार हिक बे खे सिर्फु छुहण सां सुञाणणि जो अभ्यासु करे वठन्दा आहिनि। हिकु बार अंखियूं बूटे वेहीन्दो ऐं बियनि बारनि मूं को अची उनिखे छुहीन्दो, आग डिहण वारे खे उनिनि खे सुञाणणो आहे। ऐहिड़ीयूं बियूं रांदियूं बि आहिनि जिन्हनि जो संरक्षण करण असांजो फर्जु आहे छो जो इये रांदियूं न सिर्फु सिन्धु जी विरासति आहिनि बल्कि बारनि जे विकास में बि मददगारु आहिनि। जय झूलेलाल।
– मोहन थानवी