ऐ गंगा वहिन्दी रही

मूल लेखिका: देवी नागरानी
सिन्धी अनुवाद; डॉ. गायत्री
“अरे बुधो था। हिननि बारनि खे सनानु त कराए छडियो।” मुरस खे आवाज़ डीन्दे सुधा नाश्तो तैयार करणि लगी। जडहिं सन्दसि मुरस रामप्रसाद ज़ाल जो डिनल कमु पूरो कयो त जोणसि वरी आवाज़ डिनो, “नाश्तो खाई बाज़ार मां सीधो वठी अचो। तेसीताई मां घर जी सफाई थी करे छडियां।”
रामप्रसाद खे गृहस्थी वसाए 9 साल थी विया हुआ। ऐं हिननि नवनि सालनि में हू हिननि सबणिनि कमनि जो आदती थी चुको हुओ। पर हिन विचु हुनजे मन अन्दर लगातार कुझ न कुझ..न घणों कुझ टुटंदो रहियो हुओ…बेआवाज़।
ज़िन्दगीअ जो जेको जाम हुनजे हिस्से आयो हुओ, तेहिंखे न त हू पी थे सघियो न थुके थे सघियो। हू जण नीलकंठ थी वियो हुओ। घर जी चाकरी कन्दे-कन्दे हिक हीण भावना हुनजे मन खे खाइन्दी रहन्दी हुई। नौकरीअ जी तलाश, हुन जी जान सां कई पर कामयाब न थी सघियो। बस, घर वेही ज़ाल जे कमनि में मदद कन्दो रहियो। नेठ करे बि छा हा?
“मां हफ्ते लाए माइटनि में थी वञा। तव्हां खे बि थोड़ो आराम मिली वेन्दो। पहिंजो खयालु रखजो। किकीअ खे पाण सां वठी थी वञा। बेबू तव्हां सां गडु रहिन्दो। तव्हां मथे वञो त मुहिंजो सामान हेठ लाए अचजो। बाबा खां बि त पैसा वठी अचणा आहिनि न घर खर्च लाए। घटु में घटु टे-चार डींह त लगी वेन्दा।”

“मां अजु वरी नौकरी गोल्हणि वेन्दुस। शायद मिली वञे। तू चिन्ता न कर। जल्दु ई कुझ न कुझ थी वेन्दो। रखु धणीअ ते।”
“हिन भरोसे ते ई त हर महिने पीउ अगिया हथु फैलाइण वेन्दी आहियां। तव्हां खां वधीक त मुखे शर्मु इन्दो आहे। बुडी मरण जो मन थीन्दो आहे।”
“अच्छा, तू वञु। पहिंजो खयालु रखिजइ।” चवन्दे रामप्रसाद गहरी गणतीअ में बुडी वियो।

जोए जो सामान हेठ दरवाजे वटु रखन्दे रामप्रसाद सुधा खे चयो, “भागभरी थोड़ी देर तरसु, मां गंगा सनानु करे थो अचां।” चवन्दे हू दर बाहिर निकरी वियो। ऐं सुधा उहो आवाज़ न बुधी सघी, जेको हुन दुखी हिरदे मां निकतो हुओ।
कलाकु, ब कलाक, मंझनि ऐं हाणे त शाम बि थी वेई, पर रामप्रसाद न मोटियो। गंगा सनानु कन्दे तन-मन ऐं दिमाग जे तमाम बोझनि खे सांणु खणी, गुम थी वियो हुओ शायद।
ऐं सुधा, अजु बि जडहिं बारनि खे सनानु कराइन्दी आाहे त मन मां कीकट निकरन्दी अथसि त, “हुनजो राम हुनखे कहिड़ो प्रशाद डेई वियो, कहिड़ो वरदान जो अखियुनि जी गंगा वहन्दी थी रहे, लगातार।”
Contact: Gayatriguddu1@gmail.com