गंगा बहती रही पुस्तिका की लघु कथा अखबार वारो मूर्ति

मूल लेखिका: देवी नागरानी
सिन्धी अनुवाद; डॉ. गायत्री

हा, इहो ई त आहे, जेको 35 साल पहिरीं मुहिंजो दर खुड़काए अदब भरियल सुवाली निगाहूं खणी बीठो हुओ। दर खोले मुहिंजी नज़रुनि बि साणस सुवाल कयो हुओ।
“मैडम, मां सजी कॉलोनीअ लाए अखबार आणींदो आहियां। अव्हां खे बि खपे त बुधाइजो।”
“अरे डाढो सुठो कयए। हर आरतवार ते असांजी सिन्धी अखबार हिन्दवासी इन्दी आहे, जेका मुखे ज़रूर डिजई।”
“अच्छा” चई हू डाकणि लहिण लगो। “पंजनि रुपयनि जो आहे मैडम।” चवन्दो, तेज रफ्तार सां बिन मञ्जिलुनि जा डाका लही वियो।
इहा 1972 जी गाल्हि आहे। अरसे बैद लगो जण गाल्हि आई-वेई थी वेई। साल गुज़रन्दा रहिया ऐं हर घर खे हू अखबार पहुचाइन्दो रहियो। ऐं मां पढ़हन्दी रहियैिस पऱते-पऱते जूं खबरूं। सोचुम, जे अखबार न हुजे हा, त असां त बेखबर रहिजी वञू हा खबरुनि खां। ज़माने जी रफ्तार सां बि न जुड़ी सघूं हा। आसे-पासे जे हाल-चाल सां वाकिफ रखनि थियूं इहे अखबारूं।

पोयनि बिन सालनि खां रोज़ सुबुह जो 7 बजे चाय ठाहींदे, रंधणे जी दरीअ मां डिसन्दी आहियां मूर्तिअ खे। हा, इहो ई त नालो आहे हुनजो, मूर्ति। सन्दसि धीअ सीए करे वञी साहुरो घर वसायो। पुट बैंक में नौकरी कंदो अथसि। ऐं मूर्ति, साइकिल ते अखबार जो बंडल डोहे, हलन्दो रहिन्दो आहे, हिक खां बिये घर ताईं। पतो न आहे, डीहं में केतरा डाका, चढ़हन्दो-लहिन्दो आहे। पर हिक गाल्हि आहे, हाणे हुनजी रफ्तार पहिरीं वांगुर न रही आहे। हिक टंग बि थोड़ी लुडणि लगी अथसि। 35 सालनि जो वक्तु को नढो अरसो न आहे। हेतरनि सालनि में त मशीन जा पुर्जा बि डिला थी वेन्दा आहिनि। बदलाया वेन्दा आहीनि। पर इंसानी मशीन … उफ।
हिक अण्ुाजाणु पीडा जी लहर, सिहरन बणजी दिल मंझु लथी ऐं सजे जिस्म में फैलजी वेई। हू मूर्ति, जण त अखबाारुनि सां गडोगडु पाण पहिंजो बोझ खणी हलण जो अभ्यासी थी वियो हुओ। कम जो ऐहड़ो पक्को जो देर सां ई सही, अखबार पहुचाईंदो ज़रूर आहे। जे असां घर में न हुजू्रं त दरवाजे जे कड़े में टंगे वेन्दो आहे।
जेहिं दौर-ए-वक्त मां हू अखबार वारो गुज़रियो आहे, असां बि उहो वक्त अखबार पढ़ी-पढ़ी गुज़ारियो आहे। पर पोयनि बिन वरियनि खां हुन शख्स खे, हुन जे सुस्त थीन्दडि़ कदमनि खे डिसन्दी रही आहियां। हुन खे पढ़न्दी रही आहियां त लगन्दो आहे जण आपबीती आहे। आइने अगिया भी करे बि असां किथे पाण डिसी सघन्दा आहियूं? सुञारीं सघन्दा आहियूं? बस, वक्तु मुरकन्दो रहिन्दो आहे, असांजी जवानीअ खे वेन्दो ऐं बुडापे खे इन्दो डिसी।

ऐं मां, उतेई चाय जो कोपु हथ में में झले सोचीन्दी आहियां त, छा इहा ई जि़न्दगी आहे? अजब जि़न्दगी। पाण जीए थी, पर उहो हुनुर हुन अखबार वारे खे न सेखारे सघी आहे। हुनखां अजु बि बोझ खणाए थी। हुन जी कम्बन्दडि़ हड्डियुनि ते भार विझाए थी। मथियनि घरनि जी मथियुनि मञ्जिलुनि जो सफर तय कराए थी। …ऐं मुहिंजी खिड़कीअ जे साम्हूं वारी डाकण तां धीरे-धीरे लहन्दो, हू अखबार वारो मूर्ति डिसजन्दो आहे। ब मिनट भी करे अखबारनि जे सुफनि वांगुर, हुनजी जि़न्दगीअ खे असां शायद कडहिं बि न पढ़ी सघन्दासीं।
मां पुठ वराए डिठो आहे। सच खे महसूस कयो आहे। हुन अखबारुनि खे रद्दीअ में वेन्दो डिसण अजीब लगन्दो आहे। माण्हू उहो ई पुराणो आहे, पर अखबार, रोजाना नई खणी इन्दो आहे।