लेखिका: देवी नागरानी
अनुवाद: पदमा मोटवानी
“मां खिली कोन सघियस ऐं चवंदे चवंदे मां रोई पियसि।”
नंढपुणि जा डींं॒हं बि छा त डींं॒हं हुआ। उन्हंनि डींं॒हंनि जूं यादिगिरियूं ज़हन में रंग-बिरंगी गुलनि जी सुगं॒धु जियां एतिरियूं त समायल हूंदियूं आहिनि जो यादि ईंदे ई मुरिझायल मुंहांडो बि मुर्कण लगं॒दो आहे।
गा॒ल्हि नंढी आहे पर मतिलबु वडो॒ आहे।
29 आगस्टु 2022 जे डींं॒हुं मां हिक साफु सुथरे कमरे मां निकतसि पिए त ओचितो ई थाबो॒ खाई किरी पियसि। पूरी बेहोश! उते रोशनी त हुई, पर उतां केरु ईंदो वेंदो कौन हुओ। होशु ईंदे ई ख़बर पेई त उते मथां खां पाणीअ जा फ़ुड़ा पिए टपिकिया, जिनि डां॒हुं मुंहिंजो ध्यानु कोन वियो हुओ। मुंहिंजे किरी पवण जो सबबु उहो ई हुओ।
पहिंजे बदन खे हिन हुन पासे हेरींदे फेरींदे जीअं तीअं गोड॒नि खे पकिड़ींदे उथी खड़ी थियमु। चेल्हि खे पकिड़ियो, टंगुनि खे मज़बूताईअ सां धरतीअ ते रखियो ऐं बीहंदे चंपलु हथ में खणी जिता आई हुयमि, उतां ई आहिस्ते-आहिस्ते बा॒हिरु अची वियमु। कुझु देरि उते रखियल बैंच ते वेठमि ऐं दिलि सां मालिक जा शुकराना मञण लग॒सि। ख़बर कोन्हे त उन हाज़िर नाज़िर मलिक जी मौजूदगीअ जे अहिसास मूंखे रुआरे छडि॒यो ऐं मां रोई पियमु।
अजु॒ नंढपुणि जो हिकु किस्सो याद आयो। शायद मां पंजनि छहनि वरिह्यनि जी हूंदसि। हिकिड़े डीं॒हुं मायूस थी करे घरु मोटियसि त अमड़ि सबबु पुछियो। मूं अमड़ि जे सुवाली अखियुनि में निहारींदे चयो- “अमां अजु॒ क्लास में हिक नींगरि किरी पेई ऐं सभेई बा॒र खिलण लगा॒।”
“त तूं कोन खिलण लगी॒अं छा?” अमड़ि जा॒णणु चाहियो।
मूं ग़मगीन मन सां उदासीअ जी चादर लाहींदे चयो
“उहा नींगरि मां ई हुयमि।”
बु॒धंदे ई अमड़ि बि खिलण लगी॒ हुई।
पर मां उन वक्तु बि खिली कोन सघियसि, बसि रोई पियसि।
ही लुड़िक ऐं मुर्क ज़िन्दगीअ में, दुख ऐं सुख जे पाछनि में पंहिंजो पाण ई कंहिं चश्मे वांगुरु वही निकरंदा आहिनि। हर हिक इंसान जी दिल में हिकु आखेरो हूंदो आहे, जिते हूं पंहिजा सपुना सजाईंदो आहे, जिनि जे पूरे थियण ते खुशियुनि जी बरसाति थींदी आहे है पूरा न थियण ते मायूसीअ में उदास थी करे गो॒ढ़ा गा॒ढ़ींदो आहे, जेके वरी ख्वाहशुनि खे जनमु डीं॒दा आहिनि। बि॒नि घड़ियुनि जो दुखु वंढण सां सूरि में राहत कोन मिलंदी आहे, पर मन जो बो॒झु हल्को ज़रूर थी वेंदो आहे।
जड॒हिं मां नंढी हुयमु, थियल वाक़िओ माउ खे बु॒धायो, माउ बि खिली हुई ऐं मां तड॒हिं बि रुनी हुअसि। हाणे मां वडी॒ थी वेई आहियां। अस्सी वरिह्यनि पारि, वरी किरण जी गा॒ल्हि न कंहिं सां करे सघियमु न हालु ओरे सघियमु। तड॒हिं बा॒रनि डि॒ठो, माउ बु॒धो ऐं सभु खिलिया हुआ। अजु॒ इहा गा॒ल्हि लिखंदे मां मुर्की थी पवां, पर अजु॒ किरण खां पोइ केरु बि खिलण वारो हुओ ई कोन। बसि मां ई हुयमु, जेका खिली न सघी, बसि रोई पेई।