लेखिका : देवी नागरानी
अनुवाद : पदमा गोविंद मोटवानी
थधि पेई रही हुई। हिक सुबह बर्फ़ जहिड़े टेम्परेचर में उथियसि। उथी करे उन यादि में वे ही रहियसि, जहिंखे अक्सर असां भुलिजी वेंदा आहियूं, पर हूं कड॒हिं बि कोन भुलिजंदियूं आहिनि। हीउ वक़्तु ई कुझु अहिड़ो आहे जो जेको घुरिजे, उहो हाज़िरि, हिते बि, हुते बि। भरोसो कड॒हिं घटि कोन रहियो, न ई कहिं गुंजाइश जी रंजिश।
हिक, सवा कलाक खां पोइ उथियसि त मन में हिकु ख़्यालु पैदा थियो।
बसि बुज़ुर्गीअ जूं पंहिंजूं घुरिजूं हूंदियूं आहिनि ऐं पंहिंजूं इछाऊं। मन में इछा पैदा थी, जहिंजे पूरे थियण जी का गुंजाइश ई कोन हुई। पर इन खे त चमत्कार ई चेई थो सघिजे। पंज मिनट बि कोन थिया, दरवाज़ो आहिस्ते सां खटिकाईंदे थधी आवाज़ में ‘मॉम’ सडीं॒दे दरवाज़ो खोले करे
घर जी अन्नपूर्णा कमरे जे अंदरि आई। हथ में ट्रे, कप में गरमागरम चांहिं ऐं बेगल, क्रीम सां टोस्टु थियलु।
‘मॉम’ हिते बिस्तरे ते ई वेठा हुजो, हीअ चांहिं पी वठो। हेठि डा॒ढी थधि आहे।’ मुंहिंजो कमिरो मथे हुओ।
मूं लफ़्ज़ कोन बु॒धा, हुन खे डि॒ठो, जेका मुंहिंजी अधूरी-अणपूरी, चयल-अण चयल इछा जी अण-पूणाईअ खे पूरो करे वेई, खिन पल में सिधो, हूबहू! छा चवां? इन हूबहू सच खे अखियुनि जी आलाणु में बो॒ड़े कलम रुगो॒ दर्जु करे रही आहे।
अजु॒ मूंखे वरिह्ये पहिरीं पढ़ियल उन माउ जी कहाणी यादि अची रेही आहे, जेका गोश्त जी फैक्ट्रीअ में कमु कंदी हुई। हिक डीं॒हुं हूअ पंहिंजो कमु पूरो करे उन थधे कमिरे में कुझु जाचण जे लाइ वेई, जिते गोश्त खे सलामतु रखियो वेंदो हुओ। न जा॒णु कीअं उन जो दरवाज़ो अंदिरा बंदि थी वियो ऐं हूअ उन कमिरे जी कैद में फासी पेई, जिते मदद जे लाइ अचणु कहिंजे लाइ बि नामुमकिन हुओ। हुन जी राड़ा राड़ि ऐं दरवाज़ो खटिखटाइणु सभु बेकारि अणबु॒धो रहियो। घणेई कर्मचारी वक़्त मुताबिक कमु पूरो करे हली विया। हुन जे मथां मौत जी तलिवार लटिकण लगी॒ हुई।
पंजनि कलाकनि खां पोइ फैक्ट्रीअ जे चौकीदार उन दरवाज़े खे खोले करे हुन खे बचाए वरितो। इहो बि हिकु चमत्कार ई हुओ!
पुछण ते हुन चयो “फैक्ट्रीअ में कमु कंदे 35 वरिह्य थी विया आहिनि। सभिनी कर्मचारियुनि में हिक हूअ ई हुई, जेका सुबुह जो ईंदे वक़्तु ‘गुड मॉर्निंग’ कंदी हुई ऐं वञण वक़्तु ‘गुड बाॅय’ चवंदी हुई। बि॒या सभु इअं नज़रअंदाज़ु कंदा हुआ, ज॒णु त उते हुन जो को वजूदि ई न हुजे। अजु॒ सुबुह जो हुन ‘गुड मॉर्निंग’ त चयो हुओ, पर अञां ताईं ‘गुडबॉय’, सुभाणे गडि॒जंदासी मूं कोन बु॒धो हुओ। सोचियमु फेरो लगा॒ए अचां, किथे तव्हां कम में मश्गूल त कोन आहियो”
हीअ कथा-व्यथा कोन्हे, हिक मुक़मलि विश्वास जो दस्तावेज आहे! नेकी ऐं सुठो वर्ताउ कड॒हिं बि ज़ाया कोन वेंदो आहे, वरदान ऐं ईश्वरी बख़्शीश जे रूप में वापसि मोटंदो आहे।
padmamotwani1411@gmail.com