अजमेर में जाइलि, ग्रेजूएट थिअलि बीकानेर में पणियलि ऐं पोस्ट ग्रेजूएट थिअण बैद गुजरात में रही उते जी राजनीतिअ में पहिंजो वजूद एमएलए जे रूप में ठाहिण वारी श्रीमती निर्मला वाधवानी जो सम्मान सिंधी सेंट्रल पंचायत, बीकानेर पारां आरितवार जो कयो वयो। अमर लाल मंदिर रथखाना में समाज ऐं शहर जे मुअज्जिज मेहमाननि जी मौजूदगीअ में अजमेर जी धीअ, बीकानेर जी नूअं ऐं गुजरात जे नड़िया पाटिया जी एमएलए जो सम्मान हिकु यादिगारु जलसो बणजी वयो। पंचायत जे मुखिया किशन चंद सत्यानी समेत मुअज्जिज मेहमाननि ऐं बीकानेर सिंधी समाज जी तमाम संस्थाउंनि जे नुमाइंदनि एमएलए वाधवानी ऐं उननि जे घोट सुरेश वाधवानीअ जो सम्मान शॉल, पखर पाए, गुलनि जी मालाउं ऐं स्मति चिन्ह भेंट करे कयो। पंचायत पारां छापाइलि समाज जी स्मारिका बि भेंट कई वई। विशिष्ट अतिथि शहर भाजपा अध्यक्ष शशि कांत शर्मा जो बि सम्मान कयो वयो। उननि चयो त सिंधी समाज हमेशह पार्टीअ सां ऐं पार्टी समाज सां गडु रही आहे। बीकानेर जी नारी शक्तिअ गुजरात में पहिंजो राजनीतिक वजूद बणायो आहे इआ डाढ़ी खुशीअ जी गाल्हि आहे। मुख्य अतिथि मंदिर ट्रस्ट अध्यक्ष मानूमल प्रेम ज्याणी सिंधी समाज जे शहर ऐं मुल्क जे विकास में योगदान जी चर्चा कई। पहिंजे सम्मान बैद एमएलए वाधवानीअ चयो, अजमेर ऐं बीकानेर में हासिल कइलि संस्कारनि जे करे इ मूखे गुजरात में सिंधी समाज सां गडोगडु बिअनि समाजनि जो सहकारु मिलियो ऐं तमाम वडी तादाद में वोटनि सां खटी विधानसभा में पहुंचण जो वंझु हथि आयो। उननि जो चवण हो त पहिंजी मेहनत सां त माण्हूं अगिते वधण जी कोशिश कंदो इ आहे, परिवार जे वडनि, आड़े पाड़े ऐं शहर जे बुजुर्गनि जो आशीर्वाद ऐं समूरे समाज जो सहयोग ऐं शुभ कामनाउं मिलण बि जरूरी आहे, तडहिं माण्हूं पहिंजे क्षेत्र में पहिंजे समाज जो नालो चिमकाए सघंदो आहे। उननि नारी शक्तिअ जो आहवान कयो त पहिंजे समाज ऐं मुल्क जी बहबूदीअ लाइ राजनीतिअ में बि पहिंजो वजूद बणाइनि।
इनिखां अगु सुजागु सिंधी जे संपादक देवी चंद खत्री एमएलए निर्मला वाधवानी जो परिचय डिनो। सुरेश वाधवानीअ गुजिरियलि डिहनि जे यार दोस्तारनि खे यादि कयो। उननि चयो त अमर लाल मंदिर में चेटीचंड महोत्सव ऐं रथखाना में शाखा जी यादि अजु बि ताजा आहे। उननि चयो त शाखा जे पुराने यार के कुमार आहूजा समेत घणनि दोस्तारनि सां गडुजी खुशी थी आहे। इनि मौके ते एमएलए वाधवानी खे उपन्यासकार मोहन थानवी पहिंजो नॉवेल कूचु ऐं शिकस्त भेंट कयो। जलसे में चंद्र प्रकाश आहूजा, सतीश रिझवानी, मनू मल सदारंगानी, ओमप्रकाश गंगवानी सिंधी लोकगीतनि जी प्रस्तुति डिनी। एमएलए वाधवानी जो सम्मान समाज जी नारी शक्तिअ बि कयो। सम्मान करण वारनि में लोकूमल ग्वालानी, लालचंद तुलसानी, सुंदर मामनानी, प्रकाश चंदानी, नानक हिंदुस्तानी, अर्जुन राम आवतरामानी, अशोक खत्री, किशन चंद सदारंगानी, कैलाश ग्वालानी, पवन देवानी, टीकम पारवानी, शहर भाजपा महामंत्री श्याम सिंह हाडलां, विजय ऐलानी, सोनू आसूदानी, दौलत राम, मटरू, केशव खत्री समेत समाज जा गणमान्य माण्हूं शामिल हुआ। जलसे जो संचालन सुरेश हिंदुस्तानी कयो।
-मोहन थानवी
