लेखिका : देवी नागरानी
अनुवाद : पदमा गोबिंद मोटवानी
जुरियत भरियो आवाज़ु बु॒धंदे कंधु खणी मथे निहारियमु। डि॒ठो त साम्हूं ११-१२ वरिह्यनि जी तिखन रोशनि वारी सुहिणी नींगरि बीठी हुई।
“तव्हांजो नालो?”
“मां टीना आहियां, केटीअ जी भेण, हुन खे वठण आई आहियां।” एतिरो नंढो जवाबु डि॒यण खां पोइ हूअ चुपि थी वेई।
“रोज़ु त हुन जी नानी हुन खे वठण ईंदी आहे….।”
“उहो तो ठीकि आहे, पर ओचितो मुंहिंजे पीउ जो फ़ोनु आयो त मूंखे केटीअ खे स्कूल मां वठी अचिणो आहे।”
“तव्हांजी नानी किथे आहे ऐं हूअ छो कोन आई?”
“हूअ मुंहिंजी न, केटीअ जी नानी आहे। अजु॒ छो कोन आई, मूंखे ख़बर कान्हे।” जवाबु बु॒धी करे निरिड़ ते गुंज पवण लगा॒। हीउ कहिड़ो लागा॒पो आहे? हूअ केटीअ जी नानी आहे, पर टीना जी कान्हे।
“तूं केटीअ खे किथे वठी वेंदीअं?”
“हुन जे मम्मी पापा जे घरु।” टीना जो एतिरो जवाबु बु॒धी करे वरी मां मुंझी पियसि।
“ऐं तूं किथे वेंदीअं?”
“पंहिंजे घरु” सवलाईअ सां हुन मुशकंदे जवाबु डि॒नो।
“तूं उते छो कोन वेंदीअ?”
“छो जो मां मुंहिंजी मम्मीअ साणु रहंदी आहियां, ऐं मुंहिंजो पापा केटीअ जी माउ साणु।”
संबं॒ध बिना मतलब जा हुजनि त पोइ उन्हंनि जो न हुअणु ई बेहतर आहे।
केटी ऐं टीना अञां तांई उते ई आहिनि, इन गा॒ल्हि खां बेख़बर मां पंहिंजे विचारनि जी दुनिया में गोता पिए खाधा।
“मैम मां केटीअ खे वठी वञी थी सघां?” टीना जी इन आवाज़ ते मां होश में आयसि।
“हां! रजिस्टर में सही करे हुन खे वठी वञी थी सघी।”
…. ऐं मुंहिंजी नज़रुनि साम्हूं ख़ुदग़र्ज़ीअ जी गदीअ ते वेठलि माण्हू ऐं निमाणनि जी मुश्क फुरण वारा डो॒ही चेहरा साफ़ु साफ़ु नज़रु अचण लगा॒।
तर्जुमान
पदमा गोबिंद मोटवाणी