लेखिका : देवी नागरानी
अनुवाद : पदमा गोविंद मोटवानी
हुन चयो “मां पंजे लगे॒ कम तां फ़ारिग थी करे छहे साढ़े छहे जे विच में जड॒हिं घरु पहुचंदी आहियां त लगं॒दो आहे मुंहिंजे इंतिज़ार में सभेई उदास ख़ामोशीअ खे जी रहिया आहिनि। घर जूं दरियूं-दरवाज़ा, हंध ते लेटियलु मुंहिंजो अपाहिज पीउ, माउ जी संभाल करण वारी अम्मा ऐं मुंहिंजी माउ जूं अखियूं, जिन खे लगा॒तारि चइनी पासे निहारण जी आदत पइजी वेई आहे, उहे घुमंदे ऐं कुछ गो॒ल्हींदे मुंहिंजे मथां अची अटिकंदियूं आहिनि ऐं चवण लगं॒दियूं आहिनि -“कमली अची वेईअं!” ऐं उन खां पोइ शांतिअ सां सुम्ही पवंदियूं आहिनि।
“पर तुंहिंजो नालो त बीबा आहे न ?” मूं अचरज सां पुछियोमांसि।
“हा, मुंहिंजी माउ जो नालो कमला आहे, ऐं हूअ पंहिंजी हिन अण-ओसिरियल अवस्था में मूंखे कमलीअ जे नाले सा सुञाणंदी आहे।”
जा॒णण ते ज़हन में हिक अजीब थधी लहर वहण लगी॒, इएं लगो॒ जीअं दिमाग़ में बिजिली पेई चिमिके। माउ पंहिंजे बा॒रनि खे पाले पोसे वडो॒ करण में ममता खे तप जूं हदूं पारि कराइण जी अवस्था में पंहिंजो पाण खे एतिरे कदुरि भुलिजी वेंदी आहे, जो हुन खे अहसासु बि कोन थींदो आहे त हुन जो वज़ूद बा॒रनि में समाइजी वियो आहे।
मां उन वक़्तु A.I.R स्टेशन में सिन्धी रिकॉर्डिंग जी इन्चार्ज मिस बीबा जी केबिन में वेठे संबं॒धनि जे गु॒झनि ग़ुमानी हालतुनि जे बारे में सोचींदी रहियसि। कड॒हिं लगं॒दो आहे असांजी सोच कहिड़ियुनि हदुनि में जकिड़ियल आहे, जिनि जी असांखे जा॒ण ई कोन्हे। ओसिरियल, अण-ओसिरियल अवस्थाउनि खां परियां असांजे अंदर में घणेई गुफाऊं आहिनि, जेके असांखे हर संबं॒ध सां, हर हद खे पारि कराईंदे कराईंदे असांखे पंहिंजो पाण सां जोड़ीनि थियूं। ऐं इन्हंनि गा॒ल्हियुनि जी अहमियत बीबे जहिड़ी धीअ ई समुझी सघंदी, जंहिं माउ पीउ जी सार संभाल लाइ अञां ताईं शादी कोन केई आहे।
संबं॒धु उहो ई निभाईंदो ‘देवी’, जंहिंखे संबं॒धु समुझ में आयो आहे। वीचारनि खे रोकींंदे मूं बीबा खां पुछियो-“हिन अवस्था में माउ घणनि डीं॒हनि खां आहे?”
“लगि॒भगि॒ हिकु सालु थियो आहे ऐं हुन जो इहो प्रतिघात-मूंखे कमली करे सडु॒ करणु ऐं उन रूप में गो॒ल्हणि, साम्हूं डि॒सी करे आथतु थियणु, हिन सां मूंखे अचरजु थियण लगं॒दो आहे। हुन जे दिली जज़बातुनि खे जा॒णंदे जीअं ई मां घर में घिरंदी आहियां, हुन जे साम्हूं वञी बीही रहंदी आहियां, जेसिताईं हूअ पंहिंजूं नज़रूं घुमाईंदे मूंखे डि॒संदे इहो कोन चवंदी आहे “कमली तूं अची वेईअं!”
कुझु खिन रुकिजी बीबा चवण लगी॒-“पंहिंजी हैसियत खां बा॒हिर जी अवस्था ऐं पंहिंजे अंदर जुड़िजण जी अवस्था जो नालो ई शायदि ममता आहे ऐं उहा आहे मुंंहिंजी माउ कमली।”
हुन जे चवण ऐं मुंहिंजे बु॒धण जे विच जो वक़्तु ज॒णु त रुकिजी वियो हुओ। मां केतिरियूं सदियूं पुठिते अची वेई हुअसि, इन जी जा॒ण तड॒हिं थी, जड॒हिं हुन जी आवाज़ ते मां सुधु में आयसि।
“ मैडम जी। तव्हांजी चांहिं थधी थी रही आहे।”
मां यादिगिरियुनि जे मुंझाईंदड़ि रस्ते में भिटिकी थी वञां। शायदि हू मुंहिंजे ज़हन में पंहिंजी जग॒ह ते वेठियूं आहिनि। हर घड़ी हू इन्हनि झरोखनि मां साहु खणण लाइ साम्हूं अची थियूं वञनि।