फकत हिकु डिहुं नाहें सिंधी भाषा दिवस

मोहन थानवी
मोहन थानवी

-मोहन थानवी- सिंधी भाषा दिवस जो पहिंजो महताव आहे। असांजे समाज लाइ 10 अप्रैल जो मनाइण वारो ईओ डिहुं फकत हिकु डिहं कोन आहे। इनि डिहं जी बदौलत अजु बि असां वटि उवो विरसो संरक्षित आहे, जेको असांजा वडा पहिंजी जन्मभूमि पवित्र सिंधु मूं खाली हथनि सां लडे अचण वक्ति खणी आया हुआ। उवो विरसो आहे सिंधी समाज जी बोली, भाषा, साहित्य ऐं कला-संस्कति खे हमेशह जिंदह रखणी वारी असांजी सिंधी लिपि। भाषा। ईओ सचु आहे। वक्ति गुजरण बैद गाल्हियूं विसारजी वेंदियूं आहिनि। पिणु ईओ सचु कडहिं बि विसारजण वारो कोन आहे। 1947 में जडहिं अखंड भारत विरहांङें जो सूरु सही रहयो हुओ, उनि वक्ति सिंधी समाज पहिंजे पेरनि हेठा धरती खिसकंदी डिसी करे बि कुझु न करे सघयो। सिवाय पहिंजी भाषा, साहित्य ऐं कला संस्कतिअ सां गडु सिंधु मूं निकरी पहिंजे भारत जे कुंड कुड़छ में पखरजी वञण जे। अजु उवो ई विरसो असांजी सुञाणप आहे। नई टेहीअ खे जाण हुजण तमाम जरूरी आहे के असांजो समाज सिंधी भाषा दिवस छा काण हिक त्योहार वांङुरु मनाइंदो आहे। विरहांङे बैद 1967 तोणी समाज खे पहिंजी भाषा जी मान्यता लाइ बि संघर्ष करणो पयो। तकरीबन 20 वरियह मान्यता बिना पहिंजी भाषा खे जिंदह रखण जो कमु, ऐहिड़े हालात में, जडहिं कि पेरनि हेठा धरती खिसकियल हुई, ब वक्ति पेट भरे मानी मयस्सर कोन हुई, बारनि खे छिति हेठा सुमारण हिकु सुपने वांङुरु हो। बावजूद ऐहिड़न हालात जे, असांजे वडनि सरकार तोणी पहिंजो दुख दर्द पहुंचायो ऐं आखिरुकार सरकार समाज जी घुरु जी अहमियत समझी करे 10 अप्रैल 1967 जो संविधान जी अठीं अनुसूचीअ में शामिल कयो। इनि करे इ इनि डिहंु जो महताव असांजे प्रमुख त्योहार चेटीचंड, चालिहा साहिब, थदड़ी वगैरह जेतिरो ई आहे। इनि डिहं खे डयारीअ वांङुरु मनाइण नई टेहीअ जो बि खुशीअ जो सबबु बणाइण असांजो इ फर्ज आहे। जय झूलेलाल।

error: Content is protected !!