*( जनमडीं॒हं ते खास )*
अजु॒ तारीख २३ मार्च आहे . अजो॒के डीं॒हं जे महत्व जी त असां सभिनी खे जा॒ण आहे. अजु॒ जे डीं॒हुं शहीद हेमू कालाणी जन्मु वठी हिन दुनिया मे आयो हुयो ऐं असांजे सिंधी समाज खे फखुरु करण जो सुअवसर डि॒नो.
शहीद हेमू कालाणीअ आजादीअ जी लड़ाईअ मे पहिंजो अमोलक योगदानु डि॒नो. हूअं त असांजो सिंधी समाजु कहिं परिचय जो मोहताजु कोन्हे. असांजे समाज मे घणेई संत , महात्माउनि, वीरनि जन्मु वरितो आहे. शहीद हेमू कालाणी बि उन्हनि मां ई हिकु हुओ , उहो कोई संत महात्मा न हो पर उन्हनि जो दर्जो कहिं संत- महात्मा खां घटि बि कोन हुओ.
२३ मार्च १९२३, सिन्ध राज्य जे सक्खर मे हिक बा॒लक जो जन्मु थियो जहिंजे पीउ ऐं माउ जो नालो पेसूमल ऐं जे॒ठी बाई हो, बा॒लक – जहिंजो नालो हेमूं रखियो वियो.
जड॒हिं हिन जुवानीअ मे कदमु रखियो, उन वक्त देश खे अंग्रेजनि जी गुलामीअ खां आज़ादु कराइण लाइ आंदोलन हली रहियो हो.
सिन्ध जे हिन सपूत बि भारत माता जी आजादीअ मे पहिंजो योगदानु डि॒यण जो मन मे प्रणु कयो.
हिक भेरे हेमूं कालाणीअ खे इहा जा॒ण मिली त अंग्रेज सिपाही ऐं बारूद सां भरियल हिक रेलगाडी॒ रोहिड़ी शहर मां निकरण वारी आ.
तड॒हिं हिन नौजवान मन मे इहो प्रणु कयो त हिन रेलगाडी॒अ खे केराइणो ई आहे.पुलिस जे सख्त पहिरो हूंदे बि हीउ नौजवानु पहिंजे साथियुनि सां गडि॒जी रात जे ऊंदहि मे रेल जा *बंद ( पटरियूं )* खोलण लगो॒. पर पुलिस जी नजर हिनते पइजी वई ऐं हेमू कालाणी खे गिरफ्तार कयो वयो.
आखिर मे हिनखे फासीअ जो डं॒डु डि॒नो वेयो.
फासीअ जे तय डीं॒हं २१ जनवरी १९४३ ते संदसि आखिरी इच्छा पुछी वई. सिन्ध जे सचे सपूत पहिंजे जवाब मे चयो त “हुते हाजिरु सभेई अंग्रेज *इंकलाब जिंदाबाद* जो नारो बुलंदु कंदा ऐं इनकरे सभिनी अंग्रेजनि खे उन वक्त *इंकलाब जिंदाबाद* जो नारो चविणो पयो. एतिरो ई न हिन जुवान त कैदखाने में खुशी-खुशी पहिंजो ८ पाउंड वजन बि वधायो.
फांसीअ जे तख्ते ते वञी जल्लाद जीअं हिनखे फांसीअ जो फंदो गले मे विझण थे चाहियो, सिंध जे हिन शेर जल्लाद जे हथ मां *नोड़ी (रस्सी)* जो फंदो खसे पहिंजे गले मे विझी” *इंकलाब जिंदाबाद* ” चवंदे खिलंदे -खिलंदे फांसीअ ते चढ़ी वयो.
असांखे सिन्ध जे हिन अमर शहीद हेमू कालाणी ऐं संदसि माउ-पीउ ते फखुरु आहे. धन्य आहिनि उहे माता -पिता जिन्हनि सिंध जे शेर खे जन्मु डि॒नो. धन्य आहे असांजो सिंधी समाज जो अहिड़ा शूरवीर सिंधी समाज जो नालो इतिहास मे अमर करे व्या.
*मूखे हमेशा इन्हनि महान आत्माउनि जे करे सिंधी हुअण ते फखुरु आहे…….*
*शहीद हेमू कालाणीअ जे जन्म डीं॒हं जूं समूरे सिंधी समाज खे लख- लख वाधायूं….*
*तमन्ना मतलाणी*
*गोंदिया*