सजे भारत में होली तकरीबन हिकइ नमूने सां मनाई वेंदी आहे। अचरज जी गाल्हि आहे, झूने जमाने में जडहिं सूचना संदेश मोकलण लाइ अजु वांङुरु तकनीकी कीन हुई, माण्हूं पखीनि जे परनि ते, लगरनि ते लिखी संदेश मोकलींदा हुआ तडहिं बि सजे भारत में हिक इ तरहां सां घणाई त्योहार मनाया वेंदा हुआ। पूजा पाठ जी विधि बि हिक जेहिड़ी। मिठाइयूं, नमकीन पकवान बि हिकइ जेहिड़ा। सचु आहे, खुशीअ जा रंग हिक इ जेहिड़ा थिंदा आहिनि। अजु जी भागमभाग जी जिन्दगानीअ में भलेशकु त्योहार हिकइ डिहं तोणी सुसी वया आहिनि लेकिन तडहिं बि लीक ते हलण वारा परंपराउंनि जो निर्वहनि करण वारा अजु बि आहिनि। इनि जी वडी मिसाल आहे होली। होलीअ जो त्योहार रुघो हिक या बिनि डिहनि जो न बल्कि अठनि डिहंनि जो आहे। वेद शास्त्र ऐं पुराणनि जो अध्ययन करण सां त ईओ बि समझ में अचे थो कि असुल में होली बसंतोत्सव जी पूर्णाहुति आहे। यानी बसंत पंचमीअ खां वठी होलीअ तोणी उत्सव। जलसा। ऐहिड़ा खुशीअ जा रंग असांजी सिंधु, असांजे भारत में इ डिसी था सघूं, बाकी दुनिया इनि करे इ भारत खे सोन जी झिरकी चइंदी हुई। नई टेहीअ खे जाण हुजण घुरुजे कि खास होलीअ ते अठनि डिहंनि लाइ बिआ शुभ कम छा काण न कया वेंदा आहिनि। इननि अठनि डिहंनि में होलाष्टक लगयलि चयो वेंदो आहे, छा काण! ईआ गाल्हि त तइ आहे के कहिं बि लोक प्रचलित गाल्हि जे पुठया का न का वजह हुंदी आहे। वैज्ञानिक तौर ते बि असांजी प्राचीन परंपराउंनि जे पुठया कुझु वैज्ञानिकनि कुझु वजहूं गोल्हा करे साम्हूं आनियूं आहिनि। दरअसलु जिंदगानीअ में खुशीअ जा रंग नियम कायदनि सां हलण में लुकयलि आहिनि। मुंद फिरंदी आहे त खादो पीतो बि फिरंदो आहे। थदो पचाइण ऐं देवी माता खे पूजण जे पुठया ऐहिड़ीइ वजह आहे। नई टेहीअ खे इननि गाल्हिनि जी बखूबी जाण आहे इनि करे हिति हर घर जाण जी गाल्हि न करे नई टेहीअ खे इननि गाल्हिनि, इननि परंपराउंनि जो निर्वहन करण लाइ हिमथाउं त वधीक सुठो लगंदो। होली खुशीअ जे रंगनि जो त्योहार आहे पिणु इनि वंझ ते बि चिंता वारी गाल्हि ईआ आहे त परंपरागत रूप सां पहिंजा त्योहार नथा मनायूं। आधुनिकता जे रंग में असांजा प्राचीन परंपरा जा रंग दबजी न वञनि। उथो जागो।
-मोहन थानवी